Apple ги информираше членовите на Бундестагот и федералната влада дека нивните уреди можеби биле цел на шпионски софтвер.
Германскиот министер за дигитална администрација, Карстен Вилдбергер, денес изјави дека членовите на Бундестагот и федералната влада добиле предупредувања од Apple дека нивните iPhone телефони можеби биле цел на шпионски напад.
Вилдбергер изјави за ARD дека „Apple е известен дека одредени уреди можеби биле компромитирани од таканаречен шпионски софтвер“, објави Euronews.
Министерот рече дека, според известувањето од Федералната канцеларија за безбедност на информациите (BSI), предупредувањата почнале да пристигнуваат на засегнатите телефони на 29 октомври и дека тие наведуваат дека Apple открил напад со употреба на „шпионски софтвер“.
Вилдбергер рече дека BSI „реагирал супер брзо“ и ги известил сите засегнати, со упатства што да прават за да се заштитат.
Тој не кажа колку политичари добиле предупредувања или кои политичари биле цел.
Според Вилдбергер, BSI ги советувал засегнатите да претпостават, како мерка на претпазливост, дека нивниот уред можеби е компромитиран, бидејќи предупредувањата не укажуваат дали нападот бил успешен.
Според BSI, шпионскиот софтвер од овој тип може да им даде на напаѓачите пристап до пораки, вклучително и оние испратени преку шифрирани апликации, како и повици, контакти, календари и податоци за локација.
Може да го вклучи и микрофонот и камерата на телефонот.
Ниту Apple ниту германските власти не кажаа кој би можел да стои зад нападот, пренесува Танјуг.
© Vecer.mk, правата за текстот се на редакцијата
