Едно лице загина, а друго е повредено откако два хеликоптери се судрија додека се подготвуваа за слетување во регионот на Монт Еверест во Непал рано утринава во вторникот, соопштија властите.
Еден индиски државјанин загина во несреќата, додека еден Новозеланѓанец беше спасен, изјави за „Ројтерс“ шефот на округот Солухумбу, Каман Синг Тапа Магар.
Судирот наводно се случил во базниот камп на Монт Еверест. Со хеликоптерите управувале две приватни компании, „Фиштеил ер“ и „Династи ер“.
Загинал турист
Од „Фиштеил ер“ соопштија дека нивниот хеликоптер превезувал патници спасени од Еверест кога се урнал за време на слетувањето. Индиецот кој загинал и повредениот Новозеланѓанец биле туристи, додадоа од компанијата.
Од „Династи ер“ исто така реагираа за несреќата, наведувајќи дека нивниот хеликоптер превезувал само товар.
На социјалните мрежи се појави и видео од наводниот момент на судирот на хеликоптерите. Додека група луѓе чека да оди на скијање, двата хеликоптера се судираат на само неколку метри од земјата.
Несреќата се случила за време на пикот на алпинистичката сезона во Непал, кога хеликоптерите интензивно превезуваат планинари и алпинисти низ регионот.
© Vecer.mk, правата за текстот се на редакцијата
