Младите во Македонија го напуштаат родителскиот дом на просечна возраст од 30,7 години за разлика од младите во ЕУ, кои си заминуваат на 26,3 години.
Според податоците на Евростат за 2025 година, најдолго во домот на родителите остануваат младите во Хрватска (31,5 години), Грција и Словачка (и двете по 30,9), како и во Шпанија и Италија (и двете по 30,2). Спротивно на тоа, најрано си заминуваат во Финска (21,4 години), Данска (21,8) и во Естонија и Литванија (и двете по 22,7).
Во нашиот регион, пак, младите во Србија остануваат со родителите до 30,1 година, во Босна и Херцеговина до 29,5, а во Бугарија до 27,9 години.
Евростат забележува дека насекаде во Европа има тенденција на подолго останување на младите во домовите на родителите, а тоа го поврзува со стапката на нивната вработеност.
Во 2025 година стапката на вработеност кај младите на возраст од 20 до 29 години во ЕУ изнесувала 65,5 %.
Во повеќето земји, каде што возраста на која младите го напуштаат родителскиот дом е под просекот на ЕУ, стапката на вработеност за лицата на возраст од 20 до 29 години е над просекот на ЕУ.
На пример, во земјите во кои младите имаат тенденција порано да го напуштаат родителскиот дом, како што се Холандија, Данска, Германија и Шведска, стапката на вработеност кај младите е повисока.
Во земјите во кои младите подоцна го напуштаат родителскиот дом, како што се Грција, Хрватска, Шпанија и Италија, стапката на вработеност беше пониска од просекот на ЕУ.
Во Македонија стапката на вработеност на младите во 2025 година била 50,2 %.
© Vecer.mk, правата за текстот се на редакцијата
