Во изминативе десет месеци од годинава значително е намален бројот на жртвите во сообраќајот и досега тој број изнесува 84 лица што е за 33 помалку во споредба со истиот период минатата година. Ова го изјави министерот за внатрешни работи Панче Тошковски кој истакна дека е задоволен од намалувањето на жртвите, но дека ќе се преземаат мерки за бројот на загинатите во сообраќајот да се намали уште повеќе. Рече дека е општо познато тоа што возачите внимаваат само во зоните на Сејф сити системот, па затоа најави дека дополнително полициски возила ќе контролираат сообраќајни прекршоци.
„Во иднина заради тоа што сега ги научивме камерите каде се и знаеме дека каде што има камера возиме така како што треба, каде што нема камера, повторно имаме поинаков тип на управување со моторно возило. Во иднина голем број, јас нема да кажам од старт колку, но голем број од полициските возила кои што ги има Министерството за внатрешни работи ќе бидат во исто време и уреди со кои што ќе може да се констатира неколку прекршоци. И цивилни“, вели Панче Тошковски.
На локациите каде се поставени камери, службите забележале драстично намалување на бројот на сообраќајни несреќи. Министерот Тошковски вели дека се изработува длабинска анализа за критичните точки во државата и во следниот период ќе се работи на нивно подобрување.
Во Македонија годишно во просек гинат од 145 до 150 лица во сообраќајни несреќи. Стапката на смртност е повисока од европскиот просек, кој изнесува 44 загинати на еден милион жител
„Оваа година заклучно со 8-ми октомври, за жал имаме 85 жртви, но тоа е драстично намалување кога сме имале 117 и драстично помалку во сите останати години“, додаде Тошковски.
Денеска беше презентирана Националната стратегија за безбедност во сообраќајот на патиштата 2026-2030 година, документ од 145 страници кој треба да помогне да се преполови бројот на жртви во државата.
„Мора да се градат патишта што ќе одговорат на потребите на управување со возила од 21 век. Патишта кои ќе ги заштитат нашите граѓани, з да не ни се случува повеќе возчи и други учесници во сообраќајот да страдаат поради пропусти во изведбата, несоодветната документација итн.“, изјави Никола Дујовски, универзитетски професор.
© Vecer.mk, правата за текстот се на редакцијата
