Претставници на компании од германската покраина Северна Рајна-Вестфалија се сретнаа со премиерот во Бон. Се разговарало за можноста за отворање високоплатени работни места во Македонија.
Можностите за нови германски инвестиции и за отворање високоплатени работни места во Македонија биле главните теми на средбата на премиерот Христијан Мицкоски со претставници на компании од германската покраина Северна Рајна-Вестфалија, кои веќе се присутни на македонскиот пазар.
Мицкоски на Фејсбук објави дека на средбата биле претставени можностите за вложувања во информатичко-комуникациските технологии, обновливите извори на енергија, здравството, јавната безбедност и инфраструктурата.
„Разговаравме за можностите за нови инвестиции, проширување на економската соработка и отворање нови, високоплатени работни места во Македонија“, напиша премиерот.
Посебно внимание било посветено и на дигиталната трансформација на индустријата, како една од областите во кои Македонија може да ја прошири соработката со германските компании.
„Владата останува посветена на создавање стабилна, предвидлива и конкурентна деловна клима“, наведе Мицкоски.
Тој посочи дека целта е германските компании да ја препознаат Македонија како партнер за долгорочни инвестиции, пренос на технологии и развој на висококвалификуван кадар.
Во објавата не се наведени имињата на компаниите што учествувале на средбата, ниту конкретни инвестициски проекти или износи.
© Vecer.mk, правата за текстот се на редакцијата
