Полициска акција во гостиварското село Чегране завршила со приведување на тројца мажи, откако кај еден од нив била пронајдена бела прашкаста материја, а двајца други се обиделе со автомобил да ги прегазат полициските службеници.
Случајот се случил на 12 ноември околу 20:35 часот, кога полицијата го запрела и го прегледала возилото „Мицубиши“ управувано од 26-годишен жител на Чегране. При контролата била пронајдена и одземена бела прашкаста материја, а подоцна, при претрес на неговиот дом со судска наредба, била пронајдена дополнителна количина од истата материја.
Но, полициската акција добила и опасен пресврт. Додека службените лица преземале дејствија пред домот на 26-годишникот, пристигнало возило „БМВ“ во кое биле двајца жители на селото, на возраст од 24 и 35 години.
Според информациите од МВР, тие со автомобилот се обиделе да ги прегазат полицајците, а воедно им упатиле и закани по животот, по што избегале од местото.
По преземените полициски мерки, двајцата набргу биле пронајдени и приведени.
Од МВР информираат дека по целосно документирање на случајот ќе следуваат соодветни кривични пријави.
© Vecer.mk, правата за текстот се на редакцијата
