Во католичко училиште во градот Замбоанга, на југот на Филипините, се случи пукање во кое ученик застрелал друг ученик, а потоа си го одзел животот.
На една од снимките, за која се претпоставува дека ја направил ученик додека нападот сè уште траел, се гледаат деца како лежат на подот во училницата и се обидуваат да се сокријат под клупите.
На друга снимка се гледаат ученици како во паника истрчуваат од училиштето. Набргу потоа се слушаат истрели, додека на терасата на последниот кат се забележува лице за кое се верува дека е напаѓачот.
Според наводите што се појавија на интернет, осомничениот ученик бил идентификуван како Наел Џалани.
Пиштол внел директно во училницата
Градоначалникот на Замбоанга, Кимер Адан Оласо, изјавил за локално радио дека ученикот успеал да внесе пиштол калибар .45 во училиштето.
Според неговите зборови, првата мета бил наставник кој седел на катедрата.
„Осомничениот потоа преминал во друга училница и пукал во ученик, кој подоцна им подлегнал на повредите“, рекол Оласо.
Напаѓачот го промашил наставникот, по што отишол во друга училница и го застрелал ученикот, кој подоцна починал.
На интернет се појавила и снимка за која се тврди дека самиот напаѓач ја пренесувал во живо. На неа се гледа цевката од пиштолот додека се движи низ училишниот ходник, по што се слушаат истрели.
Втора престрелка во училиште за само два месеца
Престрелката во Замбоанга се случила само околу два месеца по уште еден вооружен напад во училиште на Филипините.
Во средно училиште во градот Таклобан, во централниот дел на земјата, тогаш беа убиени тројца ученици, а уште 20 лица беа повредени.
Би-Би-Си потсетува дека за тој напад беа осомничени двајца тинејџери, при што за едниот било наведено дека редовно играл исклучително насилна онлајн игра.
Најновиот напад повторно ја потресе јавноста на Филипините. Снимките од учениците кои во паника се обидуваат да се сокријат во училниците го покажуваат хаосот што настанал додека вооружениот ученик се движел низ училишната зграда.
© Vecer.mk, правата за текстот се на редакцијата
