ВИДЕО| ВОЗНЕМИРУВАЧКИ СНИМКИ ОД ПОЛСКА: Експлозија и сирени по сомнежите за нарушен воздушен простор

Vecer | 20.11.2026

ВИДЕО| ВОЗНЕМИРУВАЧКИ СНИМКИ ОД ПОЛСКА: Експлозија и сирени по сомнежите за нарушен воздушен простор
Додај го Вечер како твој извор на Google (се отвора во нов таб)

Безбедносните камери во полското село Хмелек, лоцирано на околу 46 километри од границата со Украина, утрово снимија силна експлозија. Полската војска истражува сомневања дека два неидентификувани објекти го нарушиле воздушниот простор на земјата за време на голем руски напад врз Украина.

Снимки од инцидентот брзо се проширија на социјалните мрежи. На нив се гледа силен блесок, проследен со гласен тресок. Според полските медиуми, експлозијата се случила околу 6:35 часот по локално време во општината Лукова, во округот Билгорај, во рамките на Лублинското војводство.

Кратко по 7:00 часот, Оперативната команда на полските вооружени сили ја извести јавноста дека е можно неидентификувани објекти да навлегле во полскиот воздушен простор. Владиниот центар за безбедност бил известен за потенцијалната опасност, додека воениот персонал во моментов ги анализира податоците од радарските системи.

„Можно е да дошло до нарушување на нашиот воздушен простор по 6:30 часот. Истражуваме две потенцијални нарушувања. Добивме информации за селото Хмелек, во близина на Билгорај, и таму се проверува локацијата на можен удар“, изјави за „Полсат њуз“, потполковник Јацек Горишевски, портпарол на Оперативната команда.

Тој напомена дека полски и сојузнички авиони биле во воздух во текот на целата ноќ, додека системите за противвоздушна одбрана биле во состојба на висока готовност. Според „Некста“, војската соопштила дека снимките се совпаѓаат со податоците забележани од нивните системи за надзор.

Сирени ги разбудија жителите во Лублин и на други локации во регионот утрово. Пред 6:00 часот, Владиниот центар за безбедност издаде предупредување за закана од воздушни напади во Лублинското и Поткарпатското војводство; предупредувањето беше укинато околу 7:30 часот.

Веб-порталот „РМФ24“, објави дека итните служби пронашле остатоци од летало што се урнало во близина на селото Нови Липовјец, во истиот округ. Пожарникари беа испратени и во областа Рудник над Санем, каде што, според истиот извор, исто така паднал неидентификуван објект. Локалните власти ги повикаа жителите да останат во своите домови.

Explosion Reported in Eastern Poland! Suspected Russian Missile Raises Alarm An explosion has reportedly been spotted near Chmielek in eastern Poland, amid unconfirmed reports that a Russian cruise missile may have entered Polish airspace. The circumstances surrounding the incident remain unclear. #Europost

— EuroPost Agency (@EuroPostAgency) November 20, 2026

Жителите во близина на Олешице пријавија силен тресок, блесок на небото и тресење на нивните домови.

Полскиот премиер Доналд Туск изјави дека добил информации од своите министри и дека во моментов нема закана од воздушен напад. Засега нема извештаи за загинати, повредени или материјална штета во Полска, а нема ниту официјална потврда за природата или потеклото на објектите.

Инцидентот се случи за време на руски напад врз Украина во текот на ноќта. Според RMF24, руските сили го гаѓале и Киев со балистички ракети. Оштетени се три моста, а најмалку три лица ги загубија животите.

© Vecer.mk, правата за текстот се на редакцијата

Најчитани во последни 7 дена

Vecer.mk е прв македонски информативен портал, основан во 2004 година.

2004-2026 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004- 2026. Vecer.mk