На политичката сцена на Франција, во пресрет на претседателските избори во 2027 година, се појави името на Мира Марковиќ (Мира Душка Марковиќ), коосновач, копретседател и портпаролка на Партијата за животни.
Оваа партија слави десет години постоење, а годишнината ја искористи за да го одржи првиот официјален изборен митинг во 10-тиот арондисман во Париз. По тој повод, Марковиќ беше претставена како кандидат за претседател на Франција, со порака дека животните со години се занемаруваат во политичките програми.
На изборите во 2022 година, партијата не успеа да ги собере законски пропишаните 500 потписи за поддршка. Ситуацијата денес е поинаква. Партијата за животни сега има околу 4.000 членови и успеа да го прошири своето присуство низ целата земја. На последните локални избори, имаше 28 избрани кандидати во градови, вклучувајќи ги Монпелје, Гренобл, Марсеј и Авр.
Изборниот штаб наведува дека веќе имаат околу 140 ветени потписи на функционери кои ја поддржаа претходната кандидатура, додека активностите на терен продолжуваат.
Порасната помеѓу Франција и Србија
Мира Душка Марковиќ е родена и израсната во Франција, со мајка Французинка и татко Србин. Таа изјави дека нејзиниот престој во Србија како дете и средбата со начинот на кој се третираат животните на земјоделските имоти во родниот крај на нејзиниот татко претставуваат клучен момент во нејзиниот живот.
- Таа визија беше многу насилна и многу специфична. Остави длабок белег врз мене и трајно го промени мојот поглед на светот - се присети Марковиќ.
Од работа со најранливите до политички ангажман
Пред да се посвети на политиката, Марковиќ изгради професионална кариера во областа на психологијата и социјалната заштита. Повеќе од 17 години работеше во медицинскиот и социјалниот сектор, во рамките на центарот за обука, каде што им пружи поддршка на луѓе кои се во тешки животни околности. Меѓу оние со кои работеше беа и бегалци.
Таа се приклучи на Зелената партија во 2010 година. Сепак, соработката не траеше долго. Марковиќ ја напушти партијата затоа што сметаше дека во неа нема доволно простор за посериозно застапување на правата на животните.
Заштитата на животните како пошироко политичко прашање
Резултатите на партијата на европските избори покажуваат дека дел од гласачите се заинтересирани за нејзината програма.
На изборите во 2019 и 2024 година, таа освои околу два проценти од гласовите, односно приближно 495.000 гласови.
© Vecer.mk, правата за текстот се на редакцијата
