Артан Груби ја потпишал владината одлука за продажба на државните акции во Стопанска банка АД Битола, која била донесена на седницата на Владата одржана на 6 јуни 2023 година. Ова го тврдат од коалицијата ВРЕДИ, од каде што на прес-конференција на Саранда Имери Стафаи презентираа документи за кои велат дека ја потврдуваат улогата на поранешниот прв вицепремиер во постапката.
Како доказ, од ВРЕДИ ги посочуваат записникот од 158. седница на Владата и одлуката објавена во „Службен весник“ број 123 од 13 јуни 2023 година. Според нив, на седницата, со која претседавале Димитар Ковачевски и Артан Груби, под петтата точка од дневниот ред била разгледана информацијата за продажба на акциите во сопственост на Агенцијата за управување со одземен имот.
Од партијата наведуваат дека со заклучок број 6 била донесена одлука за давање согласност за продажба на државните акции во Стопанска банка АД Битола. На документот, објавен во „Службен весник“ под број 41-3733/8, стоел потписот на Артан Груби.
ВРЕДИ посочува дека на истата владина седница присуствувале и тогашниот министер за финансии Фатмир Бесими, министерот за надворешни работи Бујар Османи и министерот за економија Крешник Бектеши.
Од коалицијата тврдат дека оваа одлука е дел од поширока операција поврзана со преземањето на Стопанска банка Битола од страна на српскиот бизнисмен Давор Мацура. Според нивните наводи, во процесот била вклучена и компанијата „АС Сењак“, поврзана со семејството на лидерот на ДУИ, Али Ахмети, која купила пакет акции во банката, додека поврзана фирма добила кредит од пет милиони евра директно од седиштето на „Алта банка“ во Белград.
ВРЕДИ тврди дека државните акции, за чија продажба согласност дала Владата, како и приватните акции купени преку „АС Сењак“, на крајот завршиле во рацете на Мацура, со цел преземање на банката.
Од партијата ја поврзуваат владината одлука од јуни 2023 година со претходно објавените информации за кредитот од пет милиони евра и трансакциите со акциите, оценувајќи дека станува збор за поврзани чекори во процесот на преземање на банката.
ВРЕДИ упати и прашања до Али Ахмети, Фатмир Бесими и Бујар Османи, барајќи одговор дали уште на 6 јуни 2023 година во раководството на ДУИ постоел план банката да биде подготвена за преземање од страна на белградската „Алта банка“.
Од коалицијата прашуваат и дали улогата на Груби, Бесими и Османи во Владата била поврзана со овозможување продажба на државните акции, додека преку „АС Сењак“ се окрупнувале приватните акционерски пакети и се обезбедувале милионски кредити од Белград.
Станува збор за тврдења и обвинувања изнесени од ВРЕДИ на партиска прес-конференција. Во доставениот материјал не се наведени одговори од лицата и институциите кон кои се упатени прашањата.
© Vecer.mk, правата за текстот се на редакцијата
