Рускиот претседател Владимир Путин изјави дека во четвртокот одржал отворен и корисен состанок со кинескиот и американскиот колега Си Џинпинг и Доналд Трамп, оценувајќи дека американскиот претседател е вистински посветен на ставање крај на војната во Украина, но истовремено најави жесток одговор откако украинските сили по третпат за една недела го нападнаа Кримскиот мост. Овој напад, кој фрли сенка врз трилатералните разговори на маргините на самитот на АПЕК во Шенжен, го натера рускиот лидер да порача дека Кримскиот мост е исклучиво цивилен објект кој не се користи за превоз на воена опрема, поради што Русија повеќе нема да ја разгледува можноста за запирање на нападите во Црното Море и врз украинската енергетска инфраструктура.

Осврнувајќи се на разговорите во Кина, на кои се дискутирало за реформа на Обединетите нации, глобалните безбедносни прашања и неширењето на нуклеарното оружје, Путин истакна дека односите меѓу Москва и Вашингтон би можеле да бидат и подобри, но додаде оти пристапот на администрацијата на Трамп кон Русија дава „причина за оптимизам“. Тој повтори дека Москва е заинтересирана за завршување на конфликтот во Украина и дека ѝ го признава правото на таа земја на сопствена безбедност, но под услов тоа да не биде на штета на безбедноста на Русија.
Истовремено, Путин упати остри критики кон Европската Унија, оценувајќи дека Брисел се движи кон создавање воено-политички блок, што претставува директен предизвик за Москва. Рускиот претседател децидно нагласи дека Русија не може да прифати никаква форма на воена соработка меѓу Украина и Европската Унија, вклучувајќи и евентуално распоредување странски војници на украинска територија, и заклучи дека без промена на политичките елити во одредени европски држави нема да биде можно целосно обновување на меѓусебните односи.
© Vecer.mk, правата за текстот се на редакцијата