Познатата фотографија снимена од Меѓународната вселенска станица прикажува долга трага од густ чад што се шири над Њујорк непосредно по терористичките напади на 11 септември 2001 година.
Утрото, припадници на Ал Каеда киднапираа четири патнички авиони. Два удрија во кулите близначки на Светскиот трговски центар, кои подоцна се срушија. Третиот авион удри во Пентагон, додека четвртиот, по обидот на патниците да ги совладаат киднаперите, падна во близина на Шенксвил во Пенсилванија. Во нападите загинаа вкупно 2.977 луѓе.
Астронаутот на НАСА и тогашен командант на Меѓународната вселенска станица, Френк Калбертсон, беше единствениот Американец кој во тој момент не се наоѓаше на Земјата. По известувањето за нападите, станицата минувала над Њујорк, па тој од височина од 400 километри го фотографирал огромниот столб од чад. Според него, карактеристичното ширење на дното од чадот укажува дека фотографијата настанала во моментот на падот на втората кула или непосредно потоа.
Калбертсон во писмата напиша дека било многу стресно да се гледаат такви разурнувања во сопствената земја од вселенската станица, чија примарна цел била подобрување на животот на Земјата.
Тој во нападите го изгуби и својот колега Чарлс Чик Берлингем, кој бил пилот на авионот насочен кон Пентагон. По тој повод Калбертсон напиша: - Солзите во вселената не течат на ист начин.
Години подоцна, тој откри уште еден детал: набрзо по заземјувањето на целиот цивилен воздушен сообраќај, сите кондензациски траги над САД исчезнале, освен една. Тоа бил претседателскиот авион „ер форс ван“ со тогашниот претседател Џорџ Буш, кој се враќал кон Вашингтон преку сосема празното американско небо.
© Vecer.mk, правата за текстот се на редакцијата
