ВЛЕН обвини дека во ДУИ се продлабочува внатрешниот конфликт меѓу различни центри на моќ, особено околу Артан Груби и Бујар Османи. Од партијата тврдат дека лидерот на ДУИ, Али Ахмети, повторно води „игра со две лица“ – од една страна, како што наведуваат, се обидува да го заштити Груби, а од друга преку него да го ослаби Османи. ВЛЕН во новата објава упати серија остри обвинувања на адреса на ДУИ, оценувајќи дека несогласувањата во партијата сè повеќе излегуваат на површина.
Во објавата се тврди дека веќе подолго време во партиските кругови се зборува оти Османи зад затворени врати бара Ахмети да се повлече од лидерската позиција, со цел ДУИ повторно да стане поконкурентна опозиција.
Според ВЛЕН, токму поради тоа не е случајно што повторно се појавуваат шпекулации за евентуално повлекување на Ахмети, при што, како што наведуваат, се создава слика дека тој сака да си замине, но луѓето околу него не му дозволуваат.
ВЛЕН тврди дека Ахмети се обидува дополнително да го продлабочи конфликтот меѓу Артан Груби и Бујар Османи, насочувајќи ја вината кон Османи за позицијата што ДУИ ја има во однос на обвинението поврзано со случајот „Државна лотарија“.
„Во ДУИ врие“, се наведува во објавата.
Од партијата дополнително тврдат дека Артан Груби преку свои блиски поддржувачи веќе испраќа јавни пораки и дека станува свесен оти дел од неговите сопартијци се дистанцирале од него.
ВЛЕН оценува дека од тоа што Груби би можел да го каже пред надлежните органи може да зависи и иднината на дел од актуелното раководство на ДУИ.
„Некои се плашат од тоа што го знае Артан, други од тоа што може да го каже, а трети веќе пресметуваат кого би можел да повлече со себе“, се наведува во соопштението.
Во продолжение, ВЛЕН упатува и потешки политички квалификации кон ДУИ, обвинувајќи дека партијата одамна не функционира само како политичка организација, туку како структура чии главни интереси, според нив, се тендерите и заштитата на сопствените позиции.
Од ВЛЕН уште посочуваат дека правата на Албанците, според нивната оценка, се користат само како политичко алиби од страна на раководството на ДУИ.
Станува збор за партиска објава на ВЛЕН и за нивни политички тврдења и квалификации, кои во текстот не се независно потврдени.
© Vecer.mk, правата за текстот се на редакцијата
