Јавните обвинители на 28 октомври годинава ќе гласаат за избор на нов раководител на Обвинителството за гонење организиран криминал и корупција, откако ќе истече четиригодишниот мандат на актуелниот шеф Ислам Абази. Информацијата ја потврдија од Советот на јавните обвинители.
Постапката за избор треба да биде објавена во „Службен весник“, по што заинтересираните кандидати ќе имаат рок од 15 дена да ги поднесат своите пријави.
Според важечкиот Закон за јавното обвинителство, за раководител на ОЈО ГОКК може да биде избран јавен обвинител со најмалку шест години работен стаж како обвинител. Мандатот трае четири години, а законот овозможува и повторен избор.
Овие правила остануваат во сила и покрај предложените измени на Законот за јавното обвинителство, кој се наоѓа во собраниска процедура. За негово донесување е потребно двотретинско мнозинство, кое засега не е обезбедено. Со предложените измени се предвидува мандатот на раководителот на ОЈО ГОКК да трае шест години, но без можност за повторен избор.
Новиот раководител ќе го наследи Ислам Абази, кој беше избран на претходниот конкурс во конкуренција на четворица кандидати. Неговиот избор предизвика реакции во јавноста, а дополнителни полемики следуваа по објавувањето фотографии на кои Абази беше во друштво со членови на семејството на лидерот на ДУИ, Али Ахмети.
Работата на ОЈО ГОКК во изминатиот период беше предмет и на политички критики. ВМРО-ДПМНЕ реагираше особено по одлуката да биде запрена постапката поврзана со набавката на мазут, во која како осомничени беа опфатени Ратко Капушевски и Асмир Јахоски.
Истовремено, обвинителството водеше повеќе постапки против актуелни и поранешни функционери. Меѓу нив беше и предметот за поткуп против тогашниот директор на Државниот инспекторат за земјоделство, Васе Анакиев, како и предметот поврзан со наводни злоупотреби на средства од ИПАРД-фондовите, во кој меѓу обвинетите е и поранешниот директор на Агенцијата за финансиска поддршка во земјоделството и руралниот развој, Илија Стоилев.
Во тоа обвинителство се наоѓаат и поранешните специјални обвинители од СЈО, кои беа предмет на истрага за незаконско делење бонуси од милиони евра.
Изборот на нов раководител на ОЈО ГОКК ќе биде еден од позначајните кадровски процеси во обвинителскиот систем годинава, имајќи ја предвид улогата на ова обвинителство во истрагите за организиран криминал, висока корупција и злоупотреба на службената положба.
© Vecer.mk, правата за текстот се на редакцијата
