Комитетот за светско наследство на Унеско одлучи Охридскиот Регион засега да не биде впишан на листата на светско наследство во опасност. Наместо тоа, државата доби рок од пет години да ги спроведе препораките за подобрување и заштита на природното и културното наследство. Одлуката беше донесена на 48. сесија на Комитетот за светско наследство, која се одржува во Бусан, Република Кореја.
Македонската делегација во Бусан ја води амбасадорот во Париз Игор Николов со неколку државни службеници.
Според македонската делегација одлуката е израз на доверба во преземените активности.
„Во наредниот период ќе продолжи спроведувањето на конкретни мерки за заштита, вклучително и подготовката на прекуграничната Стратегиска оцена на влијанијата врз животната средина, зајакнувањето на инспекцискиот надзор и справувањето со бесправните градби, како и активностите за заштита и обновување на Студенчишкото Блато,“ изјави амбасадорот Николов во своето обраќање.
© Vecer.mk, правата за текстот се на редакцијата
