Утре со почеток во 11 часот пред спомен-костурницата, која се наоѓа во близина на манастирот Рождество на Пресвета Богородица кај село Манастирец, ќе се одржи панихида во чест 103-те видни поречани кои биле најсурово убиени во месноста Дервишка нива кај Барбарас. Овој немил настан се случил на Бадник, 1916 година.
Овој ѕверски чин се случил само неколку месеци откако во 1915 година во прилепското село Долгаец биле заклани 315 жители, вклучувајќи деца и жени. Овој масакр кој засекогаш ќе биде врежан во историјата на Поречието и македонскиот народ се случил на 6-ти јануари 1916 година, па оттука често во историските читанки може да се сретне под називот „Бадников масакр“, а поради тоа што се случил на местото викано Дервишка нива, се среќава и под називот „Масакр во Дервишка Нива“.
Спомен-плочата што ќе биде поставена всушност треба да ја замени онаа што беше демолирана во 2017 година Оттогаш оваа плоча не е возобновена, а сторителите не се пронајдени.
© Vecer.mk, правата за текстот се на редакцијата
