Од паднатите дрвја по силното невреме што неодамна го зафати Скопје ќе биде изграден нов моторички парк за деца и млади на Водно. Наместо да завршат како отпад, дел од здравите стебла ќе бидат искористени за изработка на природни реквизити и препреки кои ќе придонесат за развој на моторичките способности и физичката активност на најмладите, соопшти градоначалникот Орце Ѓорѓиевски.
Новиот простор ќе биде наменет за деца, млади и возрасни, кои ќе можат да го користат за рекреација, движење, дружење и поминување повеќе време во природа.
На местата каде што паднале дрвјата се засадуваат нови садници, а во втората половина на септември е најавена и голема есенска акција за пошумување на градот.
Паралелно со тоа, продолжуваат активностите за уредување на Водно, меѓу кои се и обновувањето на патеките и урбаната опрема.
На Водно и Матка веќе функционира и Планинската спасителна служба, подготвена за брзи и професионални интервенции во планински услови, со што се зголемува безбедноста на посетителите.
Ѓорѓиевски посочува дека целта е Водно да се обновува и унапредува со нови содржини кои ќе им служат на сите генерации.
© Vecer.mk, правата за текстот се на редакцијата
