Во употреба е ставен нов АТМ систем со кој се модернизира македонската воздухопловна навигација и се зголемува безбедноста на воздушниот сообраќај. Од М-НАВ велат дека новиот систем не е само нова опрема, туку стабилна технолошка основа врз која ќе се развива целата воздухопловна навигација во земјава. Новината доаѓа во период кога бројот на летови над македонското небо значително расте, а со новите решенија се очекува и намалување на оптоварувањето на контролорите на летање.
– Со новиот систем пред сè ја стабилизираме М-НАВ како давател на услуги и обезбедуваме поголемо ниво на сигурност, а ова е особено важно кога воздушниот сообраќај на македонското небо бележи енормен пораст. Една од важните придобивки е и намалување на оптоварување на контролорите на летање. Со подобра автоматизација, презентација и обработка на податоците и современите алатки кои се користат при рутинските работи на контролорите на летање, се создаваат условите поефикасно и побезбедно истите да се справуваат со воздушните операции. Тоа директно влијае на зголемување на капацитетот на македонскиот возодушен простор – појасни Владимир Ристески, претседател на УО и Извршен директор на Секторот за воздухопловна навигација на денешната прес-конференција.
Тој соопшти и дека до крајот на септември се очекува да се пушти во употреба и новиот радар кој е инсталиран на контролната кула во Скопје.
© Vecer.mk, правата за текстот се на редакцијата
