Веста за експлозивната направа во Бардовци предизвика нова политичка пресметка меѓу ВМРО-ДПМНЕ и СДСМ. Владејачката партија реагира на изјавите на генералниот секретар на СДСМ, Александар Саша Димитријевиќ, обвинувајќи ја опозицијата дека изнесува неточни тврдења и шпекулации за инцидентот. Од ВМРО-ДПМНЕ посочуваат дека Министерството за внатрешни работи веќе го објавило случајот во полицискиот билтен.
„Прво, МВР има информирано за инцидентот во својот билтен. Ете доказ на фотографијата“, наведуваат од ВМРО-ДПМНЕ.
Оттаму реагираат и на тврдењето дека експлозивната направа била фрлена во домот на полицискиот службеник, посочувајќи дека станувало збор за домот на неговиот татко.
„Второ, не е точно дека е фрлена бомба во домот на полицаецот, туку во домот на неговиот татко“, стои во реакцијата.
Од ВМРО-ДПМНЕ дополнително обвинуваат дека СДСМ не презентирал докази за наводите што ги изнел на прес-конференцијата, туку, како што велат, станува збор за шпекулации.
„Трето, СДС нема докази, само шарена приказна и шпекулации“, наведуваат од партијата.
Реакцијата следува откако СДСМ побара од Обвинителството да ги провери наводите за можната поврзаност на инцидентот со наводни провизии и тендери.
© Vecer.mk, правата за текстот се на редакцијата
