Грчкиот европратеник Емануил Фрагос Фрагулис, претставник на националистичката партија Грчко решение, повторно го отвори македонското прашање со провокативна објава на Фејсбук. Во неа Македонија е наречена „непостоечка државичка“, населена претежно со Бугари и Албанци.
„Порака до Урсула фон дер Лаен: Скопје е непостоечка државичка, главно со бугарско-албанско население, на грчки територии“, се наведува во објавата на неговиот профил, придружена со видео што содржи историски карти и политички пораки.
Во видеото се појавува карта на која територијата на Македонија е означена како „Вардарска“, заедно со натписот „Бугарско-албанска“, со што директно се оспоруваат македонскиот национален идентитет и државноста.
Фрагос е европратеник од 2019 година и член на групата Европски конзервативци и реформисти во Европскиот парламент. Неговата партија, предводена од Киријакос Велопулос, е позната по силно националистички позиции и по отворено противење на Преспанскиот договор.
Особено е индикативно што ваквите пораки се упатуваат директно до претседателката на Европската комисија, Урсула фон дер Лаен, а доаѓаат од политичар кој има мандат да ги претставува европските граѓани во една од клучните институции на Европската Унија.
© Vecer.mk, правата за текстот се на редакцијата
