Заедничкиот граничен премин „One Stop Shop“ на Ќафасан меѓу Македонија и Албанија влегува во финална фаза. По одлуката на македонската влада од 16 јуни, деновиве и албанската влада даде „зелено светло“ за воведување на системот со кој граничните проверки ќе се вршат со само едно запирање.
Наместо две одделни контроли кои досега создаваат километарски колони, новиот модел носи спојување и координација на полициските и царинските служби од двете земји. Ова технички не значи укинување на контролите, туку попаметна администрација која треба драстично да го скрати времето на чекање за патниците, туристите и транспортерите по должината на Коридорот 8.
Заменик-министерот за внатрешни работи, Астрит Исени, веќе оствари работна средба на Ќафасан со локалните власти од Струга, Поградец и Корча за практично усогласување на протоколот. Планот е системот најпрво да стартува на овој премин, а потоа да се прошири и на останатите гранични точки меѓу двете држави. Целиот проект ја има и поддршката на ОБСЕ, од каде нотираат дека заедничките проверки ќе ја зајакнат безбедноста и ќе овозможат побрза реакција против прекуграничниот криминал.
© Vecer.mk, правата за текстот се на редакцијата
