До 500.000 денари финансиска поддршка можат да добијат домашните компании преку двата јавни повици на Министерството за економија и труд, при што државата покрива 70 проценти од прифатливите трошоци. Мерките се насочени особено кон производните компании, а поддршката опфаќа унапредување на технологијата и технолошките процеси, како и продлабочување на соработката меѓу компаниите и универзитетите. Крајниот рок за пријавување е во вторник, а според заменик-министерот Марјан Ристески, целта е преку овие мерки да се поттикне развојот и конкурентноста на домашниот производствен сектор.
– Со овој повик се овозможува воведување иновативни методи поврзани со циркуларната економија, дигитализацијата и паметната специјализација – објаснува Ристески.
Вкупната вредност на повикот е пет милиони денари, а можат да учествуваат преработувачки компании во партнерство со универзитети. Поединечна компанија може да добие поддршка до 500.000 денари, додека Министерството покрива 70 проценти од трошоците.
Вториот јавен повик е наменет за домашните компании и има за цел имплементација и стандардизација на процесите, како и подобрување на нивната конкурентност. Вкупната вредност на овој повик е два милиони денари, а компаниите можат да добијат најмногу до 200.000 денари, со 70 проценти покривање на трошоците од страна на Министерството.
Ристески вели дека интересот на компаниите за ваквите мерки е голем бидејќи тие овозможуваат унапредување на производството, подобрување на квалитетот и воведување европски стандарди, дигитализација и паметна специјализација.
– Тоа многу значи за развојот на компаниите, а индиректно значи и подобрување на економската состојба, отворање нови капацитети и нови работни места, што е приоритет на Владата и на Министерството за економија и труд – вели Ристески.
Според него, мерките за поддршка на домашниот бизнис веќе даваат резултати преку зголемување на индустриското производство и инвестициите во домашните компании, отворање нови производни капацитети и привлекување странски инвестиции. Сето тоа резултира со подобрување на БДП, отворање нови работни места, а индиректно влијае и врз подобрувањето на животниот стандард – посочува заменик-министерот.
© Vecer.mk, правата за текстот се на редакцијата
