Пред Македонија е претежно сончева и многу топла недела, со краткотрајно зголемување на нестабилноста во вторник, а потоа повторно постепен пораст на температурите. Најжешко се очекува да биде кон крајот на работната недела, кога во Скопје температурата може да достигне околу 38 степени.
Во понеделник времето ќе биде сончево и топло во поголем дел од земјата. Во Скопје се очекуваат околу 37 степени, во Куманово до 35, додека во Охрид максималната температура ќе биде околу 30 степени.
Вторник ќе донесе нешто пониски температури во северните и западните делови. Во Тетово има зголемена веројатност за локален дожд и грмежи, а услови за краткотрајна нестабилност се прогнозираат и во Куманово и Прилеп. На југот ќе остане многу топло, со температура до околу 36 степени во Гевгелија.
Од среда повторно ќе преовладува постабилно и претежно сончево време, а во четврток и петок температурите повторно ќе растат. Во петок во Скопје се прогнозираат до 38 степени, во Куманово околу 37, а во Штип и Гевгелија околу 36 степени.
Прогнозите за Битола, Охрид, Прилеп, Штип, Струмица и Гевгелија покажуваат сличен тренд – кратко стабилизирање или благо намалување на температурите во првата половина од неделата, а потоа повторно затоплување кон четврток и петок.
© Vecer.mk, правата за текстот се на редакцијата
