ПАТАРИНА СПОРЕД ПОМИНАТ КИЛОМЕТАР, најавува министерот Николоски

Vecer | 18.11.2026

ПАТАРИНА СПОРЕД ПОМИНАТ КИЛОМЕТАР, најавува министерот Николоски
Додај го Вечер како твој извор на Google (се отвора во нов таб)

Се размислува за воведување електронска наплата на патарините на автопатите, со што нема повеќе да има физичко застапување со возилата на патарини. Вицепремиерот и министер за транспорт Александар Николоски вели дека ќе се побара и експертска помош при изработка на законот и дека се размислува да се наплаќа од километар. 

Ваквиот начин на наплата, според министерот за транспорт, ќе овозможи побрз проток на возилата, поевтина наплата за оние што ги користат автопатите и поголема сигурност и спречување сообраќајни незгоди.

- Во текот на вчерашниот ден, по враќањето од Виенскиот економски форум, имав средба со новиот претседател на Европската транспортна заедница, кој дојде во Скопје. Ова беше една од главните теми. Ќе вклучиме нивна експертиза и на тој начин би сакале да го изработиме законот имајќи предвид дека Хрватска во регионот се обидува да го примени овој систем, но сè уште го нема почнато. Во моментот почнува примената на обиколницата на Белград и тоа е горе-долу сè што можеме да видиме во регионот. Затоа ни е потребно искуство од понапредни европски држави и затоа сметав дека е корисно да го поканам, да ја презентираме нашата идеја и да вклучиме експерти од Европската транспортна заедница, кои заедно со нашите експерти ќе работат на овој закон - изјави денеска Николоски пред 21. конференција на МАСИТ посветена на вештачката интелигенција.

Николоски се надева дека во текот на декември веќе ќе може да го презентираат законот.

Наплатата, како што посочи, би била од поминат километар, со што ќе се избегне сегашната пракса иста сума да плаќаат и оние што, на пример, одат од Скопје и оние што одат од Богданци или Гевгелија. 

- Нашата идеја е да се наплаќа од километар, што ќе биде многу поправедно од ова сега затоа што сега теоретски, ако тргнете од Демир Капија и одите во Гевгелија, плаќате 100 денари на наплатната кај Смоквица и ако тргнете од Скопје кон Гевгелија, на истата наплатна повторно плаќате 100 денари, што за жителите од Демир Капија е нечесно и неправедно. И затоа сметаме дека треба да се наплаќа од поминат километар, што сериозно ќе ја намали цената - рече Николоски.

Ваквата наплата првично би се применила на новиот автопат Кичево - Охрид, кој вицепремиерот Николоски очекува целосно да биде пуштен во мај. Во следните неколку недели, како што посочи Николоски, треба да биде пуштен најтешкиот дел од автопатот со четири галерии, неколку мостови, вијадукти и најдолгите тунели.

Понатаму, ваквата наплата би се применила и на другите автопати што се градат, како што се Прилеп - Битола, Букојчани - Гостивар, Гостивар - Тетово и Кичево - Букојчани.

© Vecer.mk, правата за текстот се на редакцијата

Vecer.mk е прв македонски информативен портал, основан во 2004 година.

2004-2026 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004- 2026. Vecer.mk