Концертот на познатата македонска пејачка Сузана Гавазова, кој се одржуваше во охридското село Пештани по повод големиот христијански празник Успение на Пресвета Богородица – Голема Богородица, бил прекинат поради тепачка меѓу присутни лица.
Според информациите од терен, веднаш по започнувањето на физичката пресметка во селото дошло и до прекин на електричната енергија, па просторот каде што се одржувала веселбата останал во целосен мрак.
МВР соопшти дека шест лица се приведени поради нарушување на јавниот ред и мир со физичка пресметка за време на јавен настан во охридското село Пештани.
Како што информираат од Министерството за внатрешни работи, на 28 август 2026 година во 23:35 часот, полициски службеници од СВР Охрид ги привеле Т.И. (42) и М.И. (36), двајцата од Велес, Г.М. (52) и А.Т. (45), двајцата од Пештани, П.Б. (21) од Битола и Н.Г. (19) од Прилеп.
Според информациите од полицијата, лицата за време на јавниот настан во селото го нарушиле јавниот ред и мир со меѓусебна физичка пресметка.
Шестмината биле приведени во полициска станица, а по целосното документирање на случајот, против нив ќе бидат поднесени соодветни пријави.
Во тие моменти, додека траела полициската интервенција, полицајците користеле електрични лампи на батерии за да го осветлат просторот и да можат непречено да ја спроведат интервенцијата.
© Vecer.mk, правата за текстот се на редакцијата
