Македонскиот премиер Христијан Мицкоски оствари средба со претседателот на Србија Александар Вучиќ во Њујорк, за време на 81-та сесија на Генералното собрание на Обединетите нации.
Што објавија од тет-а-тет средбата Мицкоски и Вучиќ?
- Остварив средба со претседателот на Република Србија, Александар Вучиќ.
На средбата разговаравме за актуелните состојби во регионот, значењето на добрососедските односи, унапредувањето на соработката и заедничките интереси кои придонесуваат за стабилност, развој и просперитет на нашите народи.
Продолжуваме со отворен дијалог и конструктивна соработка во насока на јакнење на регионалното поврзување и европската перспектива на Западен Балкан, објави премиерот Мицкоски.
- Добар и отворен разговор со премиерот Христијан Мицкоски за традиционално пријателските односи меѓу Србија и С. Македонија, важноста на регионалната соработка и стабилност, како и за нашиот европски пат.
Србија сака најдобри односи со Северна Македонија, а за време на средбата разменивме мислења за понатамошно подобрување на билатералните односи, особено во областа на економијата, енергетиката, инфраструктурата и поврзаноста. С. Македонија е важен економски партнер на нашата земја и има значителен простор за понатамошно подобрување на трговската и инвестициската соработка.
Особено сме задоволни што С. Македонија ќе учествува на специјализираната изложба EXPO2027 во Белград, што ќе биде уште една можност за дополнително поврзување на нашите народи, економии и институции, објави Претседателот на Република Србија, Александар Вучиќ, по средбата со премиерот на Република С. Македонија, Христијан Мицкоски.
© Vecer.mk, правата за текстот се на редакцијата
