Можеби се помалку но, меѓу нас се уште има луѓе кои помислуваат за потребите и безбедноста и на другите а не само на сопствените. Пример е овој возач на скопски автобус.
Скопјанка преку објава на социјалните мрежи му оддаде признание на возач на автобусот број 65 на ЈСП, кој, според неа, покажал голема смиреност и професионалност за време на силното невреме што вчера го зафати главниот град.
Таа раскажува дека автобусот бил затекнат од невремето во близина на Бит-пазар, кога силниот ветер носел делови од фасади кон возилото, а дрвја паѓале на повеќе локации.
Според нејзиното сведоштво, возачот останал прибран и најпрво ги однел патниците на безбедно во гаражата во Автокоманда. Откако временските услови се стабилизирале, продолжил со возењето и ги однел патниците до нивните дестинации, наместо да ги остави да се снаоѓаат сами.
„Јас се зезав со ЈСП, ама во маката навистина се познаваат јунаците. Огромно браво и длабока почит за овој човек. Светот има потреба од повеќе вакви професионалци и луѓе со срце“, напиша скопјанката во својата објава.
Нејзината порака брзо привлече внимание на социјалните мрежи, каде многумина се приклучија со пофалби за постапката на возачот и му изразија благодарност за грижата за безбедноста на патниците за време на невремето.
© Vecer.mk, правата за текстот се на редакцијата
