Полицијата влезе во трага и експресно уапси три лица кои се осомничени за монструозните убиства што ја затресоа скопската населба Ѓорче Петров! Според неофицијалните сознанија на медиумите, зад морбидната серија злосторства стои најнискиот мотив – користољубие и пари. Осомничените сурово ги напаѓале и убивале жртвите во нивните домови, а потоа ги ограбувале!
Оваа експресна акција на МВР доаѓа непосредно откако вчера во Ѓорче Петров беше откриен уште еден морничав случај – 76-годишната О.А. беше пронајдена мртва во сопствениот дом од страна на нејзината ќерка. Телото било со тешки и видливи траги од брутално насилство. Вознемирените соседи сведочат дека несреќната жена веќе три години живеела сама откако останала вдовица, а последен пат ја виделе жива претходниот ден, додека во текот на критичната ноќ никој не слушнал ниту забележал ништо сомнително.
Ова е веќе второ застрашувачко убиство во истото маало во рок од само пет дена. Минатата недела полицијата информираше за уште еден хорор, кога 62-годишен маж исто така беше пронајден мртов со видливи повреди и траги од насилство во својот стан.
Монструозната серија што посеа страв и паника кај жителите на Скопје конечно добива правна завршница, а од Министерството за внатрешни работи се очекуваат официјалните соопштенија со сите детали за уапсената тричлена група.
© Vecer.mk, правата за текстот се на редакцијата
