Компанијата „TESSA Energy“ денеска ја пушти во употреба новата когенеративна постројка во поранешната Топлана Скопје Север, инвестиција вредна 2,5 милиони евра. Новите два генератори ќе произведуваат 2,1 мегавати електрична и 2,6 мегавати топлинска енергија, со што се зголемуваат капацитетите за производство на енергија.
Ова, според управителот на компанијата, е само првата фаза од поголем инвестициски план. Во втората фаза се предвидува дополнителна инвестиција од 10 милиони евра, со крајна цел локацијата да прерасне во современ енергетски центар.
– За нас ова не беа само деловни одлуки, презедовме многу важен енергетски објект но и одговорност да го зачуваме и дополнително да го модернизираме системот што обезбедува топлинска енергија за домаќинствата и останатите објекти во Чаир и Бутел. Но, ние не застанавме само на тоа. Уште тогаш имавме многу јасна визија да ја модернизираме постојната инфрастуркура и да ја трансформираме во современ центар за комбинирана топлинска и електрична енергија, рече Ајри Шеј.
Според вицепремиерот и министер за транспорт Александар Николоски, оваа инвестиција е показател дека и домашните компании можат да прават зелена транзиција.
– Ова е многу важно затоа што домашни компании покажуваат дека можат да се во чекор со највисоките светски трендови. Како Министерство за транспорт ќе продолжиме да ги поддржуваме овие инвестиции и во најбрз можен рок да ги завршуваме сите административни процедури за да имаме уште повеќе вакви инвестиции затоа што зелената економија и е потребна на државата, рече Николоски.
© Vecer.mk, правата за текстот се на редакцијата
