239 милиони евра досега се пласирани во македонската економија преку мерките за поддршка на домашните компании. Средствата се наменети за инвестиции, зголемување на производството и отворање нови работни места, а според министерката за финансии Гордана Димитриеска-Кочоска, мерката веќе дава резултати и поттикнува нов инвестициски циклус во приватниот сектор.
Димитриеска-Кочоска потсетува дека потребата од ваква поддршка била препознаена пред повеќе од две години, кога било утврдено дека голем број компании имаат идеи и потенцијал за развој, но немаат пристап до доволно поволно финансирање за да ги реализираат своите инвестиции.
Токму затоа, како што посочува Димитриеска-Кочоска, во соработка со бизнис-секторот и банките бил креиран модел преку кој 250 милиони евра биле ставени на располагање за развојни инвестиции во домашниот приватен сектор, под поволни услови и со полесен пристап до крајните корисници.
Средствата се обезбедени од унгарската Експорт-импорт банка, а министерката нагласува дека Владата не ги гледа како трошок за буџетот, туку како инвестиција во домашната економија.
„Поддршката за домашните компании е инвестиција во економскиот раст“, порачува Димитриеска-Кочоска.
Првата транша исплатена во март минатата година
Првата транша кон домашните компании, според нејзината објава, била исплатена во март минатата година.
Оттогаш до денес во македонската економија се пласирани вкупно 239 милиони евра.
Според министерката, овие средства веќе придонеле за започнување значаен инвестициски циклус во приватниот сектор, со ефекти врз зголемувањето на производството, отворањето нови работни места и подобрувањето на конкурентноста на домашните компании.
Таа нагласува дека целта на Владата била најнапред да се препознаат реалните потреби на домашниот бизнис, а потоа да се создадат услови тие потреби да се претворат во конкретни инвестиции.
Големиот интерес на компаниите, според Димитриеска-Кочоска, покажал дека мерката одговара на реалните потреби на бизнис-секторот.
Дополнителен ефект, како што посочува, е тоа што средствата обезбедени преку Владата се надополнуваат и со сопствен капитал на компаниите, со што вкупниот инвестициски циклус е уште поголем.
Корпоративното кредитирање со просечен годишен раст од 15 проценти
Димитриеска-Кочоска нагласува дека најважното прашање веќе не е само колку пари се пласирани, туку какви ефекти зголемениот пристап до капитал има врз реалната економска активност.
Според податоците што ги објави, првите индикатори се охрабрувачки.
Корпоративното кредитирање во периодот во кој се спроведува мерката бележи просечен годишен раст од околу 15 проценти.
Во периодот од март минатата година до јуни годинава, стапката на раст на корпоративното кредитирање се движела меѓу 13,5 и 16,5 проценти.
Според министерката, ова покажува дека кредитната активност е засилена и дека компаниите имаат подобар пристап до финансиски средства.
БДП пораснал за 3,1 проценти во првиот квартал од 2026 година
Во објавата таа се осврнува и на движењето на бруто-домашниот производ.
Растот на БДП во првиот квартал од 2026 година изнесувал 3,1 проценти.
На тоа му претходел раст од 3,5 проценти во четвртиот квартал од 2025 година, додека во третиот и во вториот квартал од минатата година растот изнесувал по 3,8 проценти.
Како еден од позначајните двигатели на растот, Димитриеска-Кочоска ги посочува јавните и приватните инвестиции.
Позитивни сигнали, според неа, се забележуваат и кај извозот, индустриското производство и вработеноста.
„Сите податоци покажуваат дека економската активност се движи во посакувана насока и се потврда за позитивните ефекти на политиките коишто ги спроведуваме“, наведува министерката.
Таа додава дека токму затоа поддршката за домашниот бизнис треба да се гледа како инвестиција во економскиот раст, а не како буџетски расход.
„Економските политики треба да се мерат преку конкретните резултати“
Димитриеска-Кочоска оценува дека резултатите од мерката се значајни бидејќи покажуваат дека економските политики треба да се оценуваат преку конкретните промени што ги предизвикуваат во реалната економија.
Како главни цели на Владата таа ги наведува зголемувањето на инвестициите, поголемото производство, создавањето посилни домашни компании, отворањето нови работни места, поголемата конкурентност и обезбедувањето одржлив економски раст.
Министерката најавува дека Владата и во следниот период ќе продолжи со креирање и спроведување мерки со кои на домашните компании ќе им се овозможи полесно да инвестираат, да го зголемуваат својот капацитет и да создаваат нова вредност за целата економија.
„Со посветеност ќе продолжиме да креираме и спроведуваме мерки кои им овозможуваат на компаниите да растат, да инвестираат и да создаваат нова вредност за целата економија“, порача Димитриеска-Кочоска.
© Vecer.mk, правата за текстот се на редакцијата
