По првичниот застој, предизвикан од незавршени административни процедури, неусвоени детални урбанистички планови, експропријација на земјиштето и задоцнети плаќања кон изведувачот, денес изградбата на Пречистителната станица за Скопје се одвива со забрзана динамика и согласно планираниот работен план, соопшти градоначалникот Орце Ѓорѓиевски.
Речиси 40% од градежните работи се веќе завршени. Согласно договорот склучен меѓу ЈП „Водовод и канализација“ – Скопје и изведувачот, завршувањето на градежните активности е предвидено во првата половина на 2028 година. Потоа следуваат две години пробна работа, која треба да заврши во првата половина на 2030 година.
– Ова значи почист Вардар, поздрава животна средина и посигурна иднина за генерациите што доаѓаат. Најголемиот еколошки проект во Македонија забрзано напредува, затоа што Скопје заслужува чиста, модерна и европска иднина! Пречистителната станица за Скопје е најголемиот и најсовремен еколошки проект во Македонија, комплексен зафат кој опфаќа изградба на околу 60 објекти и ќе донесе историска промена во заштитата на Вардар, животната средина и здравјето на граѓаните – напиша Ѓорѓиевски на Фејсбук.
© Vecer.mk, правата за текстот се на редакцијата
