Голем пожар од вчера попладне ја зафати депонијата за комунален отпад во близина на Крива Паланка, а огнената стихија и по повеќе од 12 часа се уште не е целосно ставена под контрола. Екипите се непрекинато на терен и со сите расположливи капацитети работат на локализирање на пожарот и спречување на негово понатамошно ширење.
На терен се ангажирани екипите и механизацијата на ЈП „Комуналец“ и ТППЕ Крива Паланка.
Помош на терен пристигнала и од соседната Општина Ранковце, како и од локални компании и граѓани со сопствена механизација.
„Обемот на пожарот е сериозен и повеќе од 12 часа континуирано се преземаат активности за негово локализирање и ставање под контрола. Во моментов сите расположливи капацитети се насочени кон справување со пожарот и спречување на негово понатамошно ширење“, соопштија од Општина Крива Паланка.
Од локалната самоуправа упатија благодарност до сите екипи, компании и граѓани кои се вклучија во гаснењето, додавајќи дека активностите на терен продолжуваат без прекин, а јавноста ќе биде навремено информирана за состојбата.
© Vecer.mk, правата за текстот се на редакцијата
