Тоа мора да е љубов: 15-годишен тинејџер во Висбаден украл автобус на јавниот превоз користејќи мастер клуч. Го возел околу 150 километри до Карлсруе, а потоа со него ја однел девојката до училиште.
Еден 15-годишник во Висбаден украл автобус за да помине околу 150 километри до Карлсруе – со намера таму да ја однесе својата девојка на училиште.
Како што соопшти полицијата, тинејџерот го украл автобусот во раните утрински часови во петокот од служeбниот простор на едно транспортно претпријатие. Возилото го отворил без употреба на сила и го ставил во погон со генерален клуч.
„Како дошол до клучот и зошто бил во состојба толку добро да го управува автобусот, сè уште не знаеме“, изјави портпаролка на полицијата. Нејасно е и зошто 15-годишникот решил на овој необичен – и нерегуларен – начин да ја однесе својата 14-годишна девојка на училиште.
Исчезнувањето на автобусот, кој бил наполнет со гориво претходната ноќ, бил забележан околу шест часот наутро.
Бидејќи првично се претпоставувало дека некој возач можеби тргнал со погрешен автобус, настанот дури напладне бил пријавен во полиција. Истражувањето потоа водело кон Карлсруе – каде полициска патрола го забележала автобусот на пладне. Непосредно пред тоа, 15-годишникот ја собрал својата девојка.
Тинејџерот сега ќе треба да одговара за кражба и управување возило без дозвола. Полицијата го предала на неговите старатели. Линискиот автобус останал неоштетен.
© Vecer.mk, правата за текстот се на редакцијата
