Осумгодишно девојче е тешко повредено откако било нападнато од волк во приватна зоолошка градина во Германија, соопштија локалните власти.
Нападот се случил вчера за време на специјален настан за деца во зоолошкиот парк Јохансимјуле, јужно од Берлин, соопштија властите во округот Телтов-Флеминг. Станува збор за однапред резервирана програма во која децата можат да ги придружуваат чуварите и да учествуваат во грижата за животните.
Девојчето било во ограден простор со арктички волци кога било нападнато од барем еден од нив. Таа била префрлена со хеликоптер во болница со сериозни повреди.
Во оградениот простор имало уште две девојчиња, но чувар на зоолошката градина успеал да интервенира пред волците да ги нападнат и нив. Зоолошката градина е затворена до понатамошно известување, а во тек е истрага за да се утврдат околностите на нападот.
Полицијата истражува како се случил нападот и дали имало небрежност. Германските власти потврдија дека 4 лица, меѓу кои 3 деца, добиле психолошка помош по инцидентот.
Приватниот парк за диви животни се наоѓа околу 45 километри јужно од Берлин. Се простира на повеќе од 100 хектари и е дом на околу 500 животни, вклучувајќи сиви и арктички волци, мечки и рисови.
© Vecer.mk, правата за текстот се на редакцијата
