Гугл и оваа година го објави својот голем извештај Year in Search и откри што најмногу ги интересирало корисниците ширум светот. Кога станува збор за храната, се појавија многу нови хитови, но популарното „дубајско чоколадо“ продолжи да доминира меѓу десертите. Но, што всушност најмногу се подготвувало дома? Гугл трендс ја објави листата на најбарани рецепти во светот, па ако ги планирате оброците за следната недела, овие идеи ја одбележаа годината.
Hot Honey (лут мед)
Медената глазура со години влегува во сите можни комбинации. Многумина ја додаваат на пица, ја користат во сендвичи или со неа ги завршуваат јадењата во вок за да добијат слатко-лут вкус. Бидејќи го збогатува речиси секое јадење, не е изненадување што токму „hot honey“ беше најпребаруваниот рецепт во 2025 година.
Marry Me Chicken (пилешко „ожени ме“)
Ова јадење редовно се враќа на врвот на популарноста. Рецептот доби безброј варијации, па денес постојат верзии со повеќе протеини, како и варијанти со њоки или наут.
Chimichurri (чими-чури)
Овој живописен зелен сос со аргентинско потекло најчесто се подготвува од магдонос, оригано и други зачини, а некои верзии вклучуваат и коријандер. Најчесто се служи со стек, но сè почесто се користи и со риба, како лосос или ракчиња. Свежината на билките и лесната текстура го прават совршен додаток на многу јадења.
Chia pudding (чиа пудинг)
Чиа пудингот е присутен со години, но со зголемувањето на интересот за здрава исхрана стекна светска популарност. Чиа семето е познато по тоа што ја подобрува дигестијата, придонесува за стабилизација на шеќерот во крвта и го поддржува здравјето на срцето. Иако често се додава во овесни снегулки или смутија, токму неговиот посебен контраст на текстури ги освои љубителите на ова едноставно јадење.
White Chicken Chili (пилешко во бел чили)
Во постудените денови нема ништо подобро од топла и густа чинија чили. Кога ќе здосади класичната верзија, тука е пилешкото во бел чили, кое носи освежувачка промена. Грав, зелен чили и пилешка супа му даваат богат, но избалансиран вкус на јадењето, што ја објаснува неговата голема популарност во 2025 година.
© Vecer.mk, правата за текстот се на редакцијата
