Дури ни добрата физичка кондиција можеби не е доволна за да ги заштити крвните садови од последиците на повеќечасовното седење. Долгото седење често се посматра како навика чии последици можат да се „поништат“ со редовно вежбање.
Сепак, новото истражување на научниците од Универзитетот „Далхаузи“ покажува дека ситуацијата би можела да биде посложена. Студијата испитувала дали 12 недели високоинтензивен интервалски тренинг можат да ги заштитат крвните садови на нозете од последиците на два часа непрекинато седење.
Резултатите биле изненадувачки: иако тренингот значително ја подобрил аеробната кондиција на учесниците, тој не го спречил негативното влијание на долготрајното седење врз функцијата на артериите во нозете.
Добрата кондиција не била доволна
Истражувачите следеле 21 здрави млади возрасни лица.
Единаесет учесници го завршиле програмот за високоинтензивен интервалски тренинг во траење од 12 недели, додека 10 учесници продолжиле со вообичаеното ниво на физичка активност.
Пред и по периодот на тренинг, учесниците правеле тест на велосипед за да се процени нивната аеробна кондиција.
Истражувачите потоа со ултразвук ја испитувале функцијата на поплитеалната артерија, крвен сад кој се наоѓа зад коленото и ја снабдува потколеницата со крв.
Откако учесниците поминале околу два часа непрекинато седејќи, функцијата на оваа артерија била нарушена. Важно е што истиот ефект се појавил и по 12 недели тренинг, и покрај подобрувањето на физичката кондиција.
Слични промени биле забележани и кај учесниците од контролната група, кои немале дополнителна програма за тренинг.
Зошто е ова важно?
Прeтходните истражувања укажуваа на тоа дека редовната физичка активност може да ублажи дел од штетните последици на долготрајното седење. Новото истражување, сепак, покажува дека вежбањето можеби не може целосно да ги надомести часовите поминати во седечка положба.
Тоа не значи дека физичката активност не е корисна – напротив. Редовното вежбање останува еден од најважните начини за зачувување на здравјето на срцето и крвните садови.
Но, покрај тренингот, важно е и да се прекинуваат долгите периоди на седење.
- Станете и прошетајте по долгото седење.
- Правете кратки паузи додека работите на компјутер.
- Искористете дел од времето за телефонски разговор за лесна прошетка.
- Ако седите долго, повремено раздвижувајте ги нозете и менувајте ја положбата на телото.
Не е доволно само да се вежба
„Многу луѓе претпоставуваат дека тренингот може да го надомести денот поминат во седење“, изјави д-р Дерек Кимерли, главен автор на истражувањето и професор по кинезиологија на Универзитетот „Далхаузи“.
Според неговите зборови, резултатите покажуваат дека подобрувањето на аеробната кондиција само по себе можеби не е доволно за да ги заштити крвните садови од последиците на долготрајното седење.
Затоа пораката на истражувачите не е дека треба помалку да се вежба, туку дека треба повеќе пати во текот на денот да се стане и да се прекине долгото седење.
Со други зборови, тренингот и секојдневното движење не се замена еден за друг – за здравјето на крвните садови важно е да ги има и двете.
© Vecer.mk, правата за текстот се на редакцијата
