Жена во 70-тите години го врати делумно видот откако го доби, можеби, првиот имплант на 3Д печатена биолошка рожница во светот, во пионерска операција извршена во здравствениот кампус Рамбам во Хаифа, Израел. Рожницата беше биопечатена со помош на човечки клетки и имплантирана кај пациент кој страдал од слепило на рожницата на едното око.
Развиен од израелската биотехнолошка компанија Precise Bio, имплантот претставува голем пробив во регенеративната медицина и може да помогне во решавањето на глобалниот недостиг на рожници од донори. Повеќе од 13 милиони луѓе ширум светот моментално чекаат трансплантација на рожница поради критичен недостаток на ткиво од донори. Новата технологија овозможува создавање стотици импланти од еден примерок од донор, нудејќи скалабилно решение.
„Оваа трансплантација е момент на вистинска надеж за милиони луѓе кои чекаат донации на рожница. Ова е прв пат имплант направен целосно во лабораторија од човечки клетки успешно да се користи кај човек. Ова не е само научен пробив – туку е и историски момент“ рече Ари Бат, соосновач и извршен директор на Precise Bio
Печатената рожница е произведена преку процес што комбинира биолошки материјали и човечки клетки за да се реплицира структурата и функцијата на природната рожница. Технологијата вклучува напредни мерки за контрола на квалитетот и нуди подобрена предвидливост за време на операцијата, според компанијата.
За разлика од синтетичките или традиционалните донорски импланти, печатената рожница е без загадувачи и има висока густина на клетки, што би можело да ги подобри резултатите од заздравувањето и визуелната јасност со текот на времето.
Проф. Дејвид Цадок, раководител на офталмологијата во Медицинскиот центар Шааре Зедек во Ерусалим и медицински советник на Precise Bio, рече дека имплантот е резултат на речиси една деценија истражување.
„Во текот на речиси една деценија работа со компанијата видовме како комбиниран тим од истражувачи, инженери и лекари успева да отстрани слој по слој од предизвиците што ги поставува еволуцијата. Рожницата успеа да ги симулира основните својства на човечкото ткиво, вклучувајќи ја транспарентноста и биомеханиката, кои се толку клучни за долгорочни резултати, а воедно го намалуваат ризикот од компликации.“
Проф. Мајкл Мимуни, раководител на одделот за рожница на Рамбам, потврди дека операцијата поминала добро и дека видот на пациентката веќе почнал да се подобрува. Тимот продолжува внимателно да го следи нејзиното закрепнување.
Проф. Еитан Ливни, раководител на одделот за рожница во Медицинскиот центар Рабин, а воедно и медицински советник на Precise Bio, ја нагласи меѓународната важност на иновацијата.
„Само минатата недела се вратив од извршување на серија операции на очите во Африка, каде што многу пациенти страдаат од слепило поради недостаток на импланти на рожницата и отсуство на банки за рожница одговорни за нивна обработка. Трогателно е да се помисли дека се приближува денот кога ќе можеме да им понудиме на слепите лица ширум светот, кои немаат пристап до импланти на рожницата, инженерски изработена рожница која не бара обработка од страна на банка за рожница и која пристигнува подготвена за трансплантација директно од компанијата што ја дистрибуира. Ова ќе биде вистинска револуција и ќе им го врати видот на илјадници слепи лица.“ рече тој.
© Vecer.mk, правата за текстот се на редакцијата
