Ако сакате појадок кој изгледа како да е директно од европски ресторан за бранч, а се прави за само дваесет минути дома, белгиските вафли се вистинскиот избор.
Нивната тајна е во карактеристичната длабока мрежа што ги задржува додатоците, додека тие остануваат фино крцкави однадвор и меки и воздушести одвнатре. За разлика од палачинките, за кои е потребна тава и малку повеќе трпение, кај вафлите најважно е апаратот да биде добро загреан и да не ја мешате смесата предолго.
Добрата работа е што основниот рецепт не е премногу сладок, па можете да го претворите во десерт или во солен појадок. За слатката верзија, доволно е да додадете овошје, чоколаден крем или јаворов сируп, додека крем-сирењето, прошутата, јајцата, авокадото или кашкавалот одлично одат со солената варијанта.
Рецепт за белгиски вафли
Состојки:
- 250 г брашно
- 2 јајца
- 300 мл млеко
- 80 г растопен путер
- 50 г шеќер
- 1 кесичка ванилин шеќер
- 1 лажичка прашок за пециво
- прстофат сол
- малку масло или путер за премачкување (по потреба)
Подготовка:
Прво, изматете ги јајцата со шеќерот и ванилиниот шеќер додека смесата не стане светла и пенеста. Додадете ги млекото и растопениот путер, а потоа кратко измешајте.
Во друг сад, измешајте ги брашното, прашокот за пециво и прстофатот сол. Постепено додавајте ги сувите состојки во смесата со јајца и мешајте само додека сè не се соедини. Нема потреба тестото да се мати долго време ‒ токму така вафлите ќе останат меки и воздушести.
Оставете ја смесата да отстои околу 10 минути, додека апаратот за вафли добро се загрева.
Премачкајте ги плочите со многу малку масло или путер доколку вашиот апарат го бара тоа, истурете од смесата и затворете. Печете неколку минути или додека вафлите не добијат златно-кафеава боја и не станат крцкави.
Не ги редете веднаш една врз друга. Најдобро е готовите вафли да ги поставите на решетка за да ја задржат крцкавоста однадвор.
Што да ставите врз белгиските вафли?
Тука започнува најдобриот дел од рецептот, бидејќи можете да ги прилагодите според сопствениот вкус.
За слатка верзија, пробајте комбинација од свежи јагоди или банани, чоколаден крем и малку шлаг. Боровинките, медот, јаворовиот сируп, шеќерот во прав или топка сладолед исто така совршено се вклопуваат.
Ако претпочитате солен појадок, намалете го шеќерот во основната смеса и послужете ги вафлите со крем-сирење, авокадо, варени или пржени јајца, прошута, чаден лосос или рендан кашкавал.
Мал трик за уште повоздушести вафли
Ако сакате да бидат особено лесни, одвојте ги белките од жолчките. Додадете ги жолчките во основната смеса, а белките изматете ги во цврст снег и на крајот внимателно со шпатула вмешајте ги во тестото. На тој начин ќе добиете уште повоздушеста внатрешност.
И уште еден важен детаљ: апаратот мора да биде целосно загреан пред да го истурите првиот круг. Ако не е доволно топол, вафлите ќе се печат подолго и може да останат меки наместо крцкави.
Без разлика дали ги послужувате за неделен појадок, ужина или брз десерт кога ви се јаде нешто благо, белгиските вафли се еден од оние рецепти што вреди да ги имате во тетратката ‒ со само неколку додатоци, секојпат добивате сосем поинаков оброк.
© Vecer.mk, правата за текстот се на редакцијата
