ПЕТИЦИЈА ПРОТИВ ДИНО МЕРЛИН ВО СПЛИТ - Ова се дознало за него

Vecer | 19.11.2026

ПЕТИЦИЈА ПРОТИВ ДИНО МЕРЛИН ВО СПЛИТ - Ова се дознало за него
Додај го Вечер како твој извор на Google (се отвора во нов таб)

Над 16.000 граѓани во Сплит за кратко време потпишаа петиција со која бараат откажување на настапот на Дино Мерлин на сплитската Рива на 30 декември и пренамена на планираните средства за набавка на неопходен ПЕТ/КТ (PET/CT) апарат за Клиничкиот болнички центар Сплит. Откако во јавноста се појавија шпекулации дека ангажманот на босанскиот музичар ќе чини околу 300.000 евра, градската управа излезе со официјален став, појаснувајќи дека неговиот бруто авторски хонорар изнесува 140.000 евра, дека договорот сè уште не е потпишан и дека дел од сумата ќе биде покриена од спонзори, додека остатокот од парите се однесува на продукцијата и техничката опрема за двата празнични концерта. Во однос на барањето на граѓаните, од Град Сплит порачаа дека ПЕТ/КТ уредот чини околу три милиони евра и неговата набавка во целост ќе ја финансира хрватското Министерство за здравство, но останаа без одговор на прашањата на „Слободна Далмација“ за тоа кој го предложил Мерлин, зошто неговиот хонорар е драстично повисок од останатите и дали стравуваат од бојкот на новогодишната прослава.

Освен настапот на Дино Мерлин, големо внимание и дебата во хрватската јавност предизвикаа и неофицијалните суми што градот планира да ги издвои за останатите регионални и домашни музички ѕвезди за новогодишната ноќ и празничната програма. За дочекот на Нова година на Рива се најавени Јелена Розга, за чиј настап наводно се предвидени 88.000 евра без ДДВ, и младиот пејач Јаков Јозиновиќ со речиси 50.000 евра. На останатите локации, како Прокуративи, се споменуваат хонорари од околу 80.000 евра за „Бијело дугме“, 29.000 евра за групата „Далматино“, 27.000 евра за Сергеј Ќетковиќ, 25.000 евра за Тони Цетински и 22.400 евра за дневниот дочек со Жак Хоудек, додека за останатите изведувачи меѓу кои Душко Кулиш, Мирослав Шкоро, Зорица Конџа, „Црвена јабука“, Нено Белан и „Психомодо поп“ се шпекулира со суми меѓу 7.600 и 20.000 евра, при што градските власти нагласуваат дека станува збор за првични проекции, а не за конечни трошоци.

© Vecer.mk, правата за текстот се на редакцијата

Vecer.mk е прв македонски информативен портал, основан во 2004 година.

2004-2026 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004- 2026. Vecer.mk