Хрватска најавува голема промена во системот за наплата на патиштата, со која возачите наскоро би можеле да заборават на застанувањето пред наплатните рампи. Од почетокот на март 2027 година се планира воведување на целосно електронска наплата, под името „Кролибертас“, со што патарините ќе се плаќаат без запирање и чекање.
Новиот систем, чија имплементација е планирана од 1 март 2027 година, треба да ја елиминира потребата од запирање возила на наплатните пунктови, земање картичка и плаќање при излез од автопатот. Наместо тоа, ќе се воведе систем на слободен проток на сообраќај, во кој наплатата ќе се врши електронски. За Хрватска е важно, и покрај преминот кон дигитален систем за плаќање, да не воведува вињети по примерот на Словенија или Австрија. Патарините ќе продолжат да се пресметуваат според поминатото растојание и категоријата на возила, што значи дека возачите ќе плаќаат според бројот на километри што ќе ги поминат на автопатот.
Најголемата промена се однесува на технологијата и начинот на наплата, кои ќе бидат автоматизирани, побрзи и поефикасни. Целта на новиот систем е да се намали метежот и гужвите на патарините, да се скрати времето на патување и да се намалат емисиите предизвикани од честото запирање и рестартирање на возилата.
© Vecer.mk, правата за текстот се на редакцијата
