Црна Гора од први ноември 2026 година воведува задолжителни визи за државјаните на Русија и Кина, со што престанува долгогодишниот безвизен режим за овие земји.
Одлуката е дел од усогласувањето на црногорската визна политика со правилата на Европската унија, а покрај Русија и Кина, визи ќе бидат потребни и за граѓаните на Белорусија, Саудиска Арабија и Турција.
Министерството за надворешни работи на оваа земја објавува дека овој чекор претставува еден од последните критериуми за затворање на Поглавјето 24 од преговорите со ЕУ, кое е поврзано со правдата, слободата и безбедноста.
Според властите, исполнувањето на овој критериум, исто така, го отвора патот за повлекување на околу 4 милиони евра од Европскиот план за раст за Западен Балкан. Во меѓувреме, апликациите за визи повеќе нема да бидат ограничени само на црногорските амбасади и конзулати, бидејќи граѓаните ќе можат да аплицираат и преку меѓународната визна служба VFS Global.
© Vecer.mk, правата за текстот се на редакцијата
