Траект полн со патници се судри со товарен брод во пристаниште на Крит! Камерите го забележаа моментот кога во пристаништето Суда се судрија патничкиот траект „ Елирос “ и товарниот брод „Јосиф К“
Во моментот на несреќата, траектот „ Елирос “ испловувал на редовна линија кон Пиреј со 100 патници, 32 патнички автомобили и 74 камиони. Истовремено, товарниот брод, кој превезувал 84 камиони, изведувал маневар за пристанување во пристаништето.
Видеоснимката ги прикажува драматичните секунди во кои двата брода се приближуваат еден кон друг на само неколкуметри, по што доаѓа до судир кој не било можно да се избегне.
И покрај силниот удар, во поморската несреќа нема повредени, ниту пак дошло до истекување гориво или загадување на морето.
Товарниот брод по инцидентот е закотвен во пристаништето во присуство на пристанишните власти, кои ги истражуваат точните околности под кои дошло до судирот.
За двата брода привремено е забрането испловување додека не се извршат технички прегледи и не се издаде потврда за пловидбена способност.
© Vecer.mk, правата за текстот се на редакцијата
