Специјалниот пратеник на САД, Стив Виткоф, го нарече рускиот претседател Владимир Путин „хуманитарец“ за време на денешната средба во Санкт Петербург, на која разговараа за можното завршување на војната во Украина. Виткоф го пофали Путин за ослободувањето на американскиот државјанин Стивен Хабард, а исто така му се заблагодари и за договорот што овозможува продолжување на извозот на руски дизел во Соединетите Држави.
„Вие толку многу зборувате за мојот претседател, Доналд Трамп, како за хуманитарец. И вие сте хуманитарец, господине – и за тоа ви оддавам признание“, му рече Виткоф на Путин, додека снимаа камерите на руската државна телевизија.
Оваа изјава привлече внимание во момент кога Русија веќе речиси пет години води војна против Украина, а односите меѓу Вашингтон и Киев дополнително се влошија поради потезите на Трамп во однос на Москва.
Виткоф го нарече Путин „хуманитарец“ само два дена откако руските сили извршија напад со беспилотно летало врз парк во градот Нова Водолаха, во регионот Харков, при што загинаа шест цивили – меѓу кои едногодишната Ангелина и едно 11-годишно девојче. Ангелина загинала додека била во својата количка, а нејзината мајка, Ина, подоцна починала во болница. Во нападот биле ранети уште 15 лица, меѓу кои и седум деца.
Според податоците на Обединетите нации, од почетокот на руската инвазија врз Украина во февруари 2022 година па сè до крајот на септември 2026 година, потврдена е смртта на најмалку 17.605 цивили, иако реалниот број на жртви е веројатно значително поголем. Само во првите девет месеци од оваа година, загинаа најмалку 2.570 цивили, а повеќе од 15.200 беа ранети. ОН предупредуваат дека бројот на цивилни жртви значително се зголемил оваа година поради засилените руски напади, особено оние што вклучуваат ракети и беспилотни летала.
© Vecer.mk, правата за текстот се на редакцијата
