Украинскиот претседател Володимир Зеленски соопшти дека украинските воени единици веќе неколку дена се соочуваат со сериозни нарушувања во функционирањето на сателитскиот систем „Старшилд“ (Starshield) долж целата линија на фронтот, како и на привремено окупираните територии. Повикувајќи се на извештаите од министерот за одбрана Јевхен Хмара и врховниот командант на вооружените сили Михајло Драпатиј, Зеленски нагласи дека на овој систем, кој претставува воена верзија на „Старлинк“, систематски се применуваат ограничувања на брзината поставени на 161 километар на час. Според проценките на украинската армија, не станува збор за случајни технички грешки, туку за намерни и повторливи рестрикции.
Ваквите ограничувања директно ја парализираат способноста на украинската воздушна одбрана да пресретнува руски беспилотни летала на млазен погон, бидејќи системите за пресретнување не можат да ја постигнат потребната брзина и навремено да реагираат. Зеленски призна дека поради овој проблем веќе поминале неколку руски напади, оценувајќи дека ваквата состојба им овозможува на руските сили да изведуваат попрецизни удари. Украинскиот претседател додаде дека официјален Киев веќе работи заедно со американската страна за целосно расветлување на околностите околу овие блокади на клучниот систем за воена комуникација и пренос на податоци на терен.
© Vecer.mk, правата за текстот се на редакцијата
