Германскиот канцелар Фридрих Мерц со остар тон ја нападна екстремно десничарската Алтернатива за Германија (АфД), отфрлајќи го нејзиниот концепт за „ремиграција“ и оценувајќи го како „етничко чистење“. Во жестокото обраќање пред пратениците во Бундестагот, Мерц ја обвини партијата и дека отворено ги застапува руските интереси на штета на Германија, додека истовремено ја критикуваше радикалната антиимиграциска реторика на крајната десница. Неговите остри зборови доаѓаат по покраинските избори во Саксонија-Анхалт, каде АфД победи пред демохристијаните со силна антиимиграциска кампања, а Мерц во своето обраќање потсети и на значајната улога на луѓето со странско потекло во германското општество.
„И луѓето со мигрантско потекло работат во стручните професии“, порача канцеларот од говорницата.
Тој подвлече дека таквата политика директно би удрила врз темелите на државата: „Ако се оствари она за што се залагаат овде, таканаречената ремиграција, тоа во пракса е етничко чистење врз основа на потеклото и бојата на кожата“.
Партијата АфД претходно ги отфрли сите вакви критики, тврдејќи дека етикетите за десен екстремизам претставуваат обид за ширење страв и навреда за нивните гласачи. Нивниот триумф во источната сојузна покраина Саксонија-Анхалт претставува нов сериозен политички притисок врз владејачката коалиција во Берлин, отворајќи прашања за натамошната стабилност и насока на германската внатрешна и надворешна политика.
© Vecer.mk, правата за текстот се на редакцијата
