Поранешниот сириски претседател Башар ал-Асад е осуден на смрт во отсуство, откако сириски суд го прогласи за виновен за воени злосторства и злосторства против човештвото извршени за време на граѓанската војна. На истиот судски процес на смрт е осуден и неговиот братучед по мајчина линија, Атеф Наџиб, кој според судот бил одговорен за репресијата во јужната покраина Дара, настани што му претходеа на востанието и последователната граѓанска војна јави „Асошиејтед прес“.
Наџиб ја слушна пресудата на суд, зад решетки и облечен во затворска облека. Тој е поранешен бригаден генерал во сириската армија, а во 2011 година раководел со одделот за политичка безбедност во покраината Дара.
Асад и неговиот брат Махер избегаа во Русија откако бунтовниците влегоа во Дамаск во декември 2014 година. Наџиб подоцна беше приведен и стана еден од највисоко рангираните функционери на кои им се судеше.
Пресудата против Асад е првата таква одлука откако сириските преодни власти почнаа да им судат на поранешните функционери на режимот оваа година, и на оние во притвор и на оние на кои им се суди во отсуство.
© Vecer.mk, правата за текстот се на редакцијата
