Финска ја заврши изградбата на заштитна ограда долга 200 километри долж границата со Русија, во обид дополнително да ја зајакне контролата на својата источна граница и да одговори на она што Хелсинки го нарекува променета безбедносна средина во Европа.
Оградата беше презентирана на церемонија во градот Нуија, а беше изградена на делови долж источната граница на Финска, која се протега на околу 1.300 километри, објави финскиот дневен весник „Илта-Саномат“.
Министерката за внатрешни работи на Финска, Мари Рантанен, изјави дека заштитната ограда е конкретен доказ дека земјата проактивно реагира на промените во безбедносната средина.
„Заштитната ограда на источната граница е конкретен доказ дека Финска дејствува проактивно во променетите безбедносни околности“, рече Рантанен на прес-конференцијата на Граничната служба.
Таа истакна дека војната во Украина и разните операции со хибридно влијание покажаа дека безбедносната ситуација во Европа се променила.
„Во таква ситуација, секоја земја мора да ја обезбеди сопствената безбедност, интегритетот на своите граници, националната безбедност и правото на самоопределување“, рече Рантанен.
Според неа, оградата е практичен и неопходен дел од финскиот систем за заштита на границите, како и инвестиција во безбедноста на Финска и цела Европа.
Како изгледа оградата?
Заштитната бариера покрива околу 200 километри од источната граница. Комплексот, освен самата ограда висока 4,5 метри, вклучува и систем за технички надзор, патишта и појас расчистен на теренот широк 25 метри.
Целта на проектот е да се зајакне способноста на Финска самостојно да управува со безбедноста на своите граници, а во исто време да се намали зависноста од ефикасноста на руската гранична контрола.
Хелсинки претходно предупреди за можноста за користење на миграцијата како средство за хибриден притисок и дестабилизација, што дополнително влијаеше врз одлуката за зајакнување на заштитата на источната граница.
Фото: Finnish Border Guard
© Vecer.mk, правата за текстот се на редакцијата
