Истрагата за убиството на осумгодишно девојче – случај што остана нерешен цели 65 години – конечно е завршена. ДНК-доказите открија дека за нејзината смрт бил одговорен поранешен детектив за убиства кој живеел во истото соседство. Глорија Ковалевич била убиена во Чикаго во 1960 година, а истражителите сега веруваат дека сторител бил Томас Френсис Мекинерни, поранешен полицаец од Чикаго, пренесува „Unilad“.
Глорија исчезнала на 12 ноември 1960 година, откако излегла од семејниот дом во населбата Вест Енглвуд за да оди во црква. Нејзиното тело подоцна било пронајдено во канал оддалечен неколку километри; таа била убиена со два истрела во главата. Била спроведена опсежна потрага во која учествувале бројни волонтери, како и локалната и државната полиција.
Истражителите утврдиле дека девојчето било однесено во блиска пошумена област пред убиството, а сведоци ја виделе во друштво на непознат маж. И покрај овие траги, истрагата не дала резултати, а случајот останал нерешен со децении.
Убиецот починал пред 20 години
Случајот бил повторно отворен на почетокот на 2026 година, кога ФБИ искористило податоци од веб-страница за генетска генеалогија за да ја поврзе ДНК-та од местото на злосторството со Мекинерни. Тој имал 24 години во времето на убиството и живеел во соседството на Глорија. Полицијата во Чикаго подоцна потврдила, преку дополнителни анализи на ДНК-примероци, отпечатоци од прсти и балистички докази, дека поранешниот детектив навистина бил одговорен за нејзината смрт. Мекинерни починал во 2006 година, така што никогаш нема да му се суди за злосторството.
Томас Френсис Мекинерни бил воен ветеран кој служел во полицискиот оддел на Чикаго 28 години. Подоцна се приклучил на Канцеларијата на федералниот јавен бранител, работејќи како истражител во Лас Вегас и Рино. Се пензионирал во 2004 година, откако само една година претходно, во 2003 година, бил прогласен за истакнат истражител во рамките на федералниот систем за одбрана. Според неговиот некролог, тој бил татко на пет деца и дедо.
„Можеме само да се надеваме дека Бог ќе му суди“
Откритието предизвика силни реакции во полициските редови. Шефот на одделот за истраги, Кевин Бруно, изјави за „Чикаго трибјун“ дека околностите на случајот се крајно загрижувачки.
„Фактот што тој бил полицаец е длабоко вознемирувачки за сите нас што сме ги изградиле своите кариери во оваа благородна професија. Сепак, истовремено, тоа не е нешто што ќе го минимизираме или од кое ќе бегаме“, изјави Бруно. Тој ги пофали истражителите кои со години работеле на случајот и додаде дека овој исход докажува оти полицијата не заборава.
За семејството Ковалевич, веста донесе одредено олеснување. Братот на Глорија, Адам Ковалевич, изрази надеж дека нивните родители – кои во меѓувреме починаа – сега ќе можат да почиваат во мир. Сепак, тој исто така изрази фрустрација што Мекинерни никогаш не се соочил со правдата.
„Тој никогаш не плати за она што го направи“, изјави тој за „Чикаго трибјун“. „Можеме само да се надеваме дека Бог ќе му суди“, заклучи тој.
© Vecer.mk, правата за текстот се на редакцијата
