Цените на нафтата денеска забележаа нагол пораст како директна последица на обновените тензии меѓу САД и Иран кои предизвикаа потрес на светските пазари. Нафтата од типот „брент“ за испорака во јуни поскапе за повеќе од 7 отсто во споредба со минатата недела, достигнувајќи цена од 97 долари за барел, што е значителен скок ако се земе предвид дека на крајот на февруари таа се тргуваше под 70 долари. Сличен тренд на зголемување е забележан и кај американската референтна нафта „West Texas Intermediate“.
Овој скок на цените е резултат на инцидентот во Ормуската Теснина каде американската морнарица заплени ирански брод кој патувал кон пристаништето Бандар Абас. Додека Централната команда на САД го потврди пресретнувањето на бродот, официјален Техеран остро го осуди потегот нарекувајќи го вооружена пиратерија и упати предупредување за можна одмазда.
Настанот дополнително ги влошува односите меѓу двете земји во критичен момент, непосредно пред истекот на договорот за привремен прекин на огнот. Иако американската делегација планира патување во Исламабад на втора рунда разговори, иранската државна агенција ИРНА пренесува дека Техеран одбива да учествува на состанокот, со што дипломатското решение на спорот станува сè понеизвесно.
© Vecer.mk, правата за текстот се на редакцијата
