Неименуван функционер на НАТО денес изјави дека Русија ги засилува хибридните активности во Европа, но Северноатлантската алијанса во моментов не гледа непосредна закана од руски напад.
„Иако Русите се соочуваат со многу силен отпор од Украина, тие ги зголемуваат нападите врз таа земја, како и хибридните активности во Европа. НАТО останува буден и подготвен да одговори на различните закани со кои се соочуваме. Во овој момент не гледаме непосредна закана од напад“, рече функционерот, според Ројтерс.
Тој потврди дека НАТО продолжува да ѝ дава поддршка на Украина и работи деноноќно за да ја обезбеди безбедноста на луѓето во земјите-членки.
Полскиот премиер Доналд Туск изјави во саботата дека Полска и НАТО мора да бидат подготвени за различни сценарија и дека не може да се исклучи можноста за руска провокација насочена против која било членка на НАТО.
Директорот на ЦИА, Џон Ратклиф, отпатува во Русија во вторник за кратко да се сретне со колегите од руските разузнавачки служби.
Два неименувани извори запознаени со посетата на Ратклиф на Москва изјавија за Ројтерс дека директорот на ЦИА го покренал прашањето за можна руска операција против членка на НАТО за време на состанокот со руските колеги, иако остана нејасно дали тоа била единствената цел на неговата посета, според Ројтерс.
Германскиот канцелар Фридрих Мерц изјави во вторникот дека германската влада наскоро ќе објави кој е одговорен за обидот за напад со беспилотни летала на аеродромот Лајпциг-Хале претходно овој месец.
Русија постојано негира каква било вмешаност во планирањето саботажа или напади врз Европа и ги отфрла таквите обвинувања како ширење страв.
© Vecer.mk, правата за текстот се на редакцијата
